وه‌هار کورده‌ماڵان
ماڵان بار کردن هه‌ر دانه‌ێ له بار
زمسان چگه‌و سه‌ر هات فه‌سڵ وه‌هار
ده‌نگ ته‌قه‌ێ شکیان یه‌خ که‌ڵوه‌زان
فه‌سڵ خوه‌ش چه‌کیان ئارام ده‌ێ وه گیان
وه‌فره‌یل تێویاوه ده‌یشته بؤ خاڵ خاڵ
که‌سێ دڵ نیه‌نەێ دی بچوو وه ماڵ
ئاڵه‌م سه‌ونزه‌و بؤ کؤیه و بێاوان
قنج مه‌که‌ێ که‌ڵڕه‌م[1] له سه‌رسراوان
زه‌مین سه‌ونز پوشه بؤ وه گوڵواران
شاقه‌ێ[2] که‌و مه‌یوو له سه‌رنساران
چه‌هچه‌ێ بوڵبوڵ و جیکجاک مه‌ل
ده‌نگ ترنگه‌ێ ئاو وه‌فراو له ناو په‌ل
شه‌ونم نیشتگه له سه‌ونزه‌زاران
تراوه‌ت داگه چؤ پرزه‌ێ واران
وه‌هاران خاسه گوڵ ئه‌و گوڵ چڕێ
سه‌ونزه شوون پاێ وه‌هار داوڕێ
ماڵ بار کردگه چگه وه وانه
زه‌مین چؤ ئه‌رووس زڵف کردگه شانه
وه‌هار هاتگه گشتێ پێ شاده
نه‌زم جه‌هانه هه‌ر له ئێ واده
نیشانه‌ێ قودره‌ت خوداێ ئه‌زیمه
جڵوه‌ێ له موعاد وه چه‌و خوه‌م دیمه
یه شوکر یه‌زدان ها وه ده‌یشته‌وه
وڵاتان بؤیه‌س وه بهه‌یشته‌وه
درباره این سایت